CERAE - Ein Blog auf Latein

Hoc anno praemio bene de vita beata meritorum et merentium afficiuntur: SOS Mediterraneum (naufragis auxilium ferendi causa), Natura Mater Cambosia (naturam servandi causa), duae feminae, quarum una pro iuribus mulierum certat (i.e. Eunice Brookman-Amissah), altera naturam servandam curat (i.e. Phyllis Omido). Unoquoque anno Holmiae honorantur homines, qui res meliores reddentes se assiduos fortesque praestent.

Iam multis in civitatibus magno studio agitur, ut quam plurimi homines tecto non recepti domicilium inveniant atque eo loco assidue vivant. Quem ad finem sedes parantur, quo homines parvo pretio habitare possint. Praeterea hominibus auxilium praebetur, ut bene domum adveniant. Iam bene evenit in Finnia, ubi res publica ipsa una cum sociis insulas aedificandas hominesque adiuvandos curat.

In Germania foederali anno MMXXII homines non tantum pecoris cenaverunt quantum antea: Numerus et bovum et suum necatorum minutus est. Iam minus pecoris condicionibus miserrimis alitur minusque aquae frumentique sumitur, ut nos homines carnem habeamus. Non iam tanta pecora flatus ventris emittunt, quibus aeri noceant. Nos, si pluribus alimentis in agris partis fruimur, et nobis et aliis animalibus et climati commodo esse scimus. Varii sunt cibi, quos nihilo nisi frugibus parare possumus. (Klick auf das Bild oder den Titel, um auf die Version mit Vokabelhilfen zu gelangen!)

Novum: Balaenae, quae ante insulam hodie Sri Lanca nominatam vivunt, non iam tanto periculo mortis opprimuntur, quia nonnulli gubernatores cursu commutato regiones, quas haec animalia inhabitant, vitant. Balaenae navibus onerariis saepe ita laesae sunt, ut vulneribus confectae perirent. Naviculariae maximae, i.e. Naviculariae Mediterraneae (Mediterranean Shipping Company) nunc animalia servare placet. Hoc modo mercatura hominum balaenis non iam periculo mortis est.

Quod in dies plus hominum alimenta servare in animo habent, gaudeo. Nam saepe alimenta repudiantur, quamquam nihil aliud cibum ad edendum inutilem esse indicat quam datum inscriptum. Sed nos ipsi oculis naribusque cognoscimus, num alimenta integra sint. Alimentis, etiamsi neque recentissima neque pulcherrima sunt, tamen bona cena parari potest. Nutrimentis quam maxime diligenter fruimur, cum utilibus utimur atque abundantia dividimus. Hoc modo copias certe minus profuse, fortasse iustius consumimus.

Quotannis a.d. VIII. Idus Martias dies internationalis feminarum agitur. Qua re verba Berthae von Suttner, quae maximo cum studio iura feminarum provehenda atque pacem servandam curavit, refero: "Fortasse necesse est homines toto in orbe sorores se praestare, antequam genus humanum amore fraterno alius cum alio consentire possit."

Ianus deus, a cuius nomine primum mensem Ianuarium appellamus, duas frontes habet: Tempus praeteritum et futurum simul spectat. Nobis temporibus, quocumque nos vertimus, istam pestem conspicimus. Sed oculos ad alias quoque res advertamus, quae hominibus et aliis animalibus vel saluti vel detrimento sint. Futura respicientes videamus, ut res meliores reddamus.

In Gallia lex nova animalia quaedam protegit: Homines bestias spectaculi causa in circum mittere vetantur. Bestias emere, habere, transportare mox non longius licebit. Praeterea quicumque domesticum animal in familiam assumere in animo habet, non sine mora desideratum accipiet, ne id animal nunc temere ad se domum recipiat, nunc alio loco exponat. Quae res et aliae crudelitates gravius punientur quam antea.

Praemium Nobelianum pacis hoc anno Maria Ressa et Dmitri Muratow accipient. Qui diurnarii magno cum studio libertatem sentiendi, loquendi, imprimendi defendunt, ut potestas potentium terminetur. Eisdem persuasum est, quaecumque nuntiata sint, facta esse oportere - non ficta. In Vicipaedia latina plus de his relatoribus legere potes!

His temporibus a fabrica Berolinensi stili pigmentarii eo modo compositi venduntur, ut facillime homines omnium colorum pingere possimus. Si umquam cutem hominum pingere in animo habuisti, colorem naturaliter reddere difficile factu esse scis. Pigmentis idoneis collectis imagines maximae varietatis sine ullo labore exprimuntur!

In nonnullis urbibus in Europa sitis naviculam gratis mutuari possumus, si ad aquam purgandam parati sumus: Rogamur, ut forcipibus doliisque instructi eas res, quae perniciose ab hominibus in aquam iactae sunt, colligamus et ad ripam portemus, ubi removeantur. Hoc modo navicula viridi ("Greenkayak") nobis gaudio orbique terrarum saluti per aquam navigare possumus.

In tecto cuiusdam aedificii magni altique, quod in Monaco urbe situm est, herbae, flores, arbores pomiferae coluntur, ut animalibus variis alimenta praebeant. Eo loco non solum apes et papiliones et scarabaei et aliae huius modi bestiolae pascuntur, sed etiam oves! Quae cum vi et arte in altum transferri debuerint, bestiolae sua sponte advolant.

Nunc rursus pluribus hominibus convenire licet quam praeteritis mensibus. Igitur discipuli discipulaeque octavo quoque die convenire possunt, ut adultos adhortentur. Quos enim (imprimis eos, qui in re publica versantur) admonere solent, ut videant, ne clima plus detrimenti capiat. Alii quoque in viis sunt, ut diem Veneris pro rebus futuris agant.

Mense Iunio memoriam eorum revocare solemus, qui olim via Christophori magna cum violentia tractati sunt, quia coniunctissime cum hominibus eiusdem sexus vivebant. Nunc toto orbe terrarum multis in viis forisque publicis varietas celebratur.

Quotannis a.d. XIII. Kalendas Iunias oculi ad apes advertuntur. Nam hic dies apibus dedicatus est, ut nos homines eas tutemur. Apibus amissis fruges vix aegreque nasci constat. Et alimenta hominum et varietas animalium satorumque una cum bestiola in periculo est. Adsimus igitur apibus: Herbas floresque praebeamus atque videamus, ne in agris nostris veneno pereant.